Sohiba Rossiya Federaciyasınıń Omsk qalasında ótkerilgen konfereciyada 1-dárejeli diplom iyesi boldı

         Joqarı oqıw orınlarında ziyrek hám qábiletli studentler menen islew, házirgi zaman talaplarına juwap bere alatuǵın tájiriybeli, básekiles, joqarı bilimli, erkin pikirlew hám ózi tańlaǵan tálim baǵdarı boyınsha joqarı bilimge, innovaciyalıq texnologiyalardı jarata alıw uqıbına iye bolǵan qánigelerdi tayarlaw, «Ustaz-shákirt» birge islesiwin rawajlandırıw arqalı jas dóretiwshilerdiń dóretiwshilik qábiletin asırıw hámde iskerligin jetilistiriw hám xoshametlewden ibarat.

         Buǵan ayqın mısal retinde, usı jıldıń 14-iyun kúni Rossiya Federatciyası Omsk qalasında bolıp ótken «Вопросы современных научных исследований» atamasındaǵı xalıq aralıq konferenciyada Berdaq atındaǵı Qaraqalpaq mámleketlik universiteti Matematika fakulteti Ámeliy matematika hám informatika tálim baǵdarı 3-kurs studenti Rajjabboyeva Sohiba qatnasıp, 1-dárejeli diplom menen sıylıqlandı.

         Sohiba óziniń úlgili minezi, ilimge qumarlılıǵı menen toparındaǵı studentlerden ajıralıp turadı. Ol, házirgi erisken nátiyjeleri menen de student-jaslarǵa órnek bola aladı. Búgingi kúni onıń bir neshe ilimiy maqalaları respublikalıq ilimiy jurnallarda baspadan shıǵarılǵan. Mısalı retinde, «Universitet xabarshısı» jurnalınıń 2019-jılı 4-sanında «Об одном двустороннем методе решения» temasında, «Ózbekstan ilimler akademiyası» xabarnamasınıń 2020-jıl 1-sanında «Об одном способе улучшения сходимости метода простой итерации решения нелинейных скалярных уравнений» atamasında óziniń ilimiy miynetlerin baspadan shıǵarǵan. Onnan tısqarı da bir qansha universitet, respublikalıq hám xalıq aralıq tańlaw hám konferenciyalarda da belsene qatnasıp, sertifikat hám diplomlar menen sıylıqlanǵan.

         Sohiba sıyaqlı izleniwsheń student-jaslarımızdıń aramızda kóbeyiwi, ilim pánniń rawajlanıwında ayırıqsh áhmiyetke iye.