Qısqı dem alıs waqtında student-jaslardıń waqtın mazmunlı ótkeriwlerin shólkemlestiriw, programmalastırıw hám IT tarawına qızıǵıwshı jaslardı anıqlaw hám olardıń usı taraw boyınsha tuwrı baǵdar alıwın qollap-quwatlaw maqsetinde Qaraqalpaq mámleketlik universiteti student-jasları ushın universitettiń Matematika fakulteti Algoritmlestiriw hám programmalastırıw texnologiyaları kafedrası tárepinen tez (sportlıq) programmalastırıw boyınsha Onlayn olimpiada shólkemlestirilip atır. Olimpiada da qatnasıwdı qálewshi student-jaslar KarSU Judge sistemasınan (https://judge.allpro.uz) dizimnen ótiwleri múmkin.
Dizimnen ótiwde tómendegilerge itibar qaratıw kerek boladı:
- Atıńız hám familiyańız tolıq jazılıwına;
- Elektron pochtańızdıń tuwrı kiritiliwine;
- Fakultet hám qánigeligińizdi tuwrı kórsetiwge;
- Baylanısıw ushın baylanıs telefonıńızdı kiritiwge;
Olimpiada 2022-jılı 15-yanvar kúni bolıp ótedi, bunda hár bir qatnasıwshı individual tártipte másele sheshiwleri kerek boladı. Hár bir qatnasıwshı ushın 10 másele qoyıladı, másele sheshimi tolıq testten ótken jaǵdayda, hár bir másele ushın sistema tárepinen avtomatikalıq 10 ball berilip barıladı. Hár bir qatnasıwshınıń másele sheshimindegi kodları sistema tárepinen haqıyqıylıqqa tekseriledi.
Olimpiada kúnine shekem KarSU Judge sistemasınan dizimnen ótip, shınıǵıw (workout) ushın berilgen esaplardı islep kóriw múmkinshiligi jaratılǵan.
